2030-njy ýylda Astana şäherinde Ýeňil atletika boýunça ýapyk binalardaky dünýä çempionaty geçiriler. Bu barada Gazagystanyň Ýeňil atletika federasiýasy habar berdi.
Bu möhüm karar 20-nji martda Polşanyň Torun şäherinde geçirilen Bütindünýä ýeňil atletika federasiýasynyň geňeşiniň mejlisinde yglan edildi. Federasiýanyň prezidenti Sebastýan Kou bu kararyň sportuň gerimini giňeltmek we täze bazarlara çykmak strategiýasynyň bir bölegidigini belledi. Onuň sözlerine görä, beýle sebitlerde ýaryşlaryň geçirilmegi ýeňil atletikanyň dünýä kartasyndaky ornuny berkitmäge kömek eder.
Gazagystanyň Ýeňil atletika federasiýasynyň prezidenti Ashat Hasenow bolsa bu wakany ýurduň sport boýunça edýän tagallalarynyň halkara derejesinde ykrar edilmegi diýip kabul edýändigini aýtdy. Şeýle-de ýaryşyň iň ýokary derejede geçiriljekdigine we sportuň ösmegine güýçli itergi berjekdigine ynam bildirdi.
Astana şäheri bu uly ýaryşa taýýarlyksyz hem däldir. Çünki gazak paýtagtynda mundan öň, 2023-nji ýylda Ýeňil atletika boýunça ýapyk binalardaky Aziýa çempionaty, World Indoor Tour Gold Halkara ýaryşlaryň tapgyrlary ýaly möhüm sport çäreleri geçirilipdi.
