Afrikadan gelen çäge tozany Türkiýäniň günorta sebitlerine-de baryp ýetdi. Bu tebigy hadysa sebäpli asman adaty bolmadyk mämişi reňke bürendi we birnäçe şäherlerde aralyklary görmek kynlaşdy diýip, Anadolu agentligi habar berýär. Aralyklary görmek ýagdaýynyň ýaramazlaşmagy sebäpli, ýurduň häkimiýetleri raýatlary ýollarda seresap bolmaga çagyrdy.
Güýçli günorta şemaly Afrikanyň çöllerinden gelen tozany Antalýa welaýatyna getirdi. Alanýa şäherinde we onuň töweregindäki etraplarda asman narynç öwüsdi. Ir ertirden tozanly bulutlar tutuş sebiti gurşap alan bolsa, agşamky apy-tupan läbik ýagşyň ýagmagyna sebäp boldy. Netijede, awtoulaglar, dälizler we açyk ýerler laý gatlagy bilen örtüldi.
Adanada hem tozanyň täsiri bilen howanyň hili peseldi we aralyklary saýgarmak gaty kynlaşdy. Ulaglaryň üstünde galyň tozan gatlagy emele geldi. Mersinde tozanly bulutlar şäher merkezine, şeýle hem Bozýazy, Silifke we Tarsus etraplaryna täsir etdi.
Şonuň ýaly, Hataýda-da asmany goýy ümür gurşap aldy. Meteorologlaryň berýän maglumatyna görä, tozan bölejikleri sebitde ertir agşama çenli saklanar. Kilisde bolsa Siriýa tarapdan gelen tozanly bulut çägeli şemal bilen güýçlendi, bu bolsa ýollarda kynçylyklaryň döremegine sebäp boldy.
Ýatladyp geçsek, bir gün ozal, ýagny 2-nji aprelde şuňa meňzeş ýagdaý Türkiýeden daşarda hem hasaba alyndy. Hususan-da, Saharadan gelen tozan sebäpli Gresiýanyň Krit adasynyň asmany hem gyzyl reňke bürenipdi.
