Gazagystanly alymlar rak keseline garşy göreşýän DVC derman serişdesini işläp taýýarlamagy dowam etdirýär. Kliniki synaglaryň 2026-njy ýylda tamamlanmagyna garaşylýar, şondan soň ony hasaba almak üçin resminamalary tabşyrmak meýilleşdirilýär.
Bu derman serişdesini işläp taýýarlamak bilen Nazarbaýew uniwersitetiniň ýanyndaky «Astana» milli barlaghanasy meşgullanýar. 2024-nji ýylda derman hassalaryň gatnaşmagynda synaglaryň bir tapgyryndan geçdi. Häzirki wagtda barlaglar Astananyň onkologiýa merkezinde, şeýle hem birnäçe sebit lukmançylyk edaralarynda dowam edýär.
Ylym we ýokary bilim ministrliginiň maglumatlaryna görä, derman serişdesini işläp taýýarlamagyň möhletleri halkara standartlaryna laýyk gelmek zerurlygy sebäpli uzaldyldy. Bu ýagdaý Almatydaky, Astanadaky we beýleki sebitlerdäki hassalaryň gatnaşmagynda goşmaça synaglaryň geçirilmegini talap etdi.
Işler Saglygy goraýyş ministrligi we Milli derman serişdelerini seljeriş merkezi bilen bilelikde alnyp barylýar. Şeýle hem Ýewraziýa ykdysady birleşiginiň talaplary göz öňünde tutulýar.
2024-nji ýylda geçirilen synaglaryň birinji tapgyrynyň netijeleri boýunça, 15 sany hassadan ybarat bolan toparda çişleriň ortaça 30% azalandygy hasaba alyndy.
Ikinji tapgyr 2024-nji ýylyň 1-nji iýulynda başlandy. Oňa gatnaşmak üçin 5 müňe golaý adam arza tabşyrdy, olardan 3 müň hassa saýlanyp alyndy.
Synaglar tamamlanandan soň, işläp düzüjiler derman serişdesini Gazagystanda hasaba almak üçin resminamalary tabşyrmagy göz öňünde tutýar. Halkara derejesinde hasaba almak bolsa milli derejede tassyklanandan soň mümkin bolar.
