Peruwyň Aukalýama şäherinde dünýäniň iň dar öýi peýda boldy. Oddity Central neşiriniň habar bermegine görä, bu täsin binanyň ini bary-ýogy 63 santimetre barabardyr.
Bu öýi ýerli ýaşaýjy Fabio Moreno gurdy. Binanyň ölçegleriniň örän kiçidigine garamazdan, onuň içinde ýaşamak üçin ähli zerur şertler döredilipdir.
Öýüň içinde aşhana we naharhana, ýatylýan we iş otag, hammam we kir ýuwulýan ýer bar.
Öý iki gatdan ybarat bolup, gatlar özara basgançaklar arkaly birleşdirilýär. Emma içeriniň giňişliginiň çäklidigi sebäpli, onuň içinde bir wagtyň özünde ýekeje adam bolup bilýär.
Häzirki wagtda bu bina islendik kişi üçin açykdyr. Fabio Moreno öz emelini Ginnesiň rekordlar kitabyna girizmek üçin eýýäm resmi arza tabşyrdy. Ol bu binanyň dünýäniň iň dar öýi hökmünde resmi taýdan ykrar edilmegine garaşýar.
