Dünýäniň azyndan 12 sany iri awtomobil öndürijisi elektromobil çykarmak baradaky meýilnamalaryna täzeden seretdiler. Olaryň bu babatdaky maksatnamasyny gysgaldanlary-da, ondan doly ýüz öwrenleri-de bar diýip, Financial Times neşiri habar berýär.
Bu sanawa Honda, Bentley, Lotus, Audi, Porsche, Mercedes-Benz, Ford, Stellantis, Volvo, Rolls-Royce, Lamborghini we Ferrari ýaly meşhur markalar girýär. Gazetiň çaklamasyna görä, täze modelleriň ýatyrylmagy we strategiýalaryň üýtgemegi sebäpli pudak soňky bir ýylyň içinde azyndan 75 milliard dollar ýitgi çekdi.
Mysal üçin, Honda 2040-njy ýyla çenli içinden ýanýan hereketlendirijili (IÝD) ulaglary bes etmek meýilnamasyndan ýüz öwürdi we ýakyn iki ýylda 16 milliard dollara çenli ýitgi çekmegine garaşýar. Rolls-Royce 2030-njy ýyldan soňam ýangyçly awtomobilleri öndürmegi dowam etdirjekdigini mälim etdi. Ferrari bolsa 2030-njy ýyla çenli elektromobil öndürmek meýilnamasyny iki esse azaltdy.
Mercedes-Benz, Ford, Volvo meňzeş beýleki kompaniýalar hem ýakyn on ýylyň içinde zil elektrikli ulaglara geçmek baradaky maksatlaryny gysgaltdylar.
Financial Times bu düýpli üýtgeşmeleri ABŞ-da döwlet tarapyndan berilýän goldawlaryň we salgyt ýeňillikleriniň ýatyrylmagy, Ýewropa Bileleşiginde ekologik talaplaryň gowşadylmagy, içinden ýanýan hereketlendirijili awtomobillere bolan islegiň heniz hem ýokary derejede saklanmagy ýaly ýagdaýlar bilen düşündirýär.
