Parižiň «Disneyland» seýilgähinde 2 milliard ýewrolyk giň gerimli üýtgedip gurmak işleriniň bir bölegi bolan «Doňan ýüregiň dünýäsi» atly täze tematik zolak açyldy. Bu barada «Associated Press» agentligi habar berýär.
Täze zolak adybir animasiýa filminden ylham alnyp döredildi. Onuň merkezi bölegi Elzanyň buzly köşgi we skandinaw obasynyň stilindäki Erendell şäheri boldy.
Üýtgedip gurmak işleri seýilgähiň 34 ýyllyk taryhynda iň uly taslama boldy. Taslamanyň çäklerinde «Walt Disney Studios Park» seýilgähiniň ady «Disney Adventure World» diýlip üýtgedildi.
Bu taslama Disney kompaniýasynyň, takmynan, 60 milliard dollarlyk ählumumy maýa goýum maksatnamasyna degişlidir. Şeýle hem, bu 18-nji martda wezipä bellenen kompaniýanyň täze ýolbaşçysy Joş D’Amaronyň döwründe ilkinji uly waka boldy.
Fransiýanyň Prezidenti Emmanuel Makron bu taslamanyň ähmiýetini belläp, «Disneyland-iň» Ýewropanyň iň iri syýahatçylyk ugurlarynyň biri bolup galýandygyny nygtady. Onuň aýtmagyna görä, seýilgähiň giňeldilmegi 1000 töweregi iş ornuny döreder.
1992-nji ýylda açylanyndan bäri seýilgähe 445 milliondan gowrak adam baryp gördi, maýa goýumlaryň umumy möçberi bolsa 13 milliard ýewrodan geçdi.
