30-njy martda Türkmenistanyň daşary işler ministriniň orunbasary Mähri Bäşimowa ÝUNISEF-iň Türkmenistandaky wekili Jalpa Ratna bilen duşuşyk geçirdi. Türkmenistanyň DIM-iniň habar bermegine görä, taraplar hyzmatdaşlygyň häzirki ugurlaryny maslahatlaşdy.
Esasy üns bilim, durmuş goraglylygy we durnukly ösüş ulgamlaryndaky bilelikdäki taslamalara gönükdirildi. Şeýle hem ÝUNISEF-iň Türkmenistan üçin 2026–2030-njy ýyllara niýetlenen ýurt maksatnamasynda göz öňünde tutulan wezipelere aýratyn garaldy.
Söhbetdeşler mekdebe çenli bilimi ösdürmek meseleleri boýunça hem pikir alyşdy. Jemgyýetçilik işi ulgamyny kämilleşdirmek, hünärmenleri taýýarlamak, iş orunlaryny döretmek we institusional gurallary ösdürmek meseleleri maslahatlaşyldy.
2026–2030-njy ýyllar üçin çaganyň irki ösüşi boýunça Milli strategiýasynyň kabul edilmeginiň möhümdigi bellenildi. Mundan başga-da, taraplar inklýuziw bilim infrastrukturasyny ösdürmek boýunça taslamalary durmuşa geçirmek hem-de çagalary goramak we çagalar boýunça adyl kazyýet işi baradaky Milli maksatnamany taýýarlamak meselelerine seretdi.
