Süýjüli diabet keselinde ulanylýan metformin dermanynyň garaşylmadyk tarapdan peýdasynyň ýüze çykmagy köpleri begendirdi.
Bu dermanyň garry adamlarda görüjiligiň ýitmegine getirýän esasy sebäpleriň biri bolan makulýar degenerasiýanyň (gözüň torly gatlagynyň zeperlenmeginiň) howpuny hem azaldyp bilýändigi hakyndaky Çikago uniwersitetiniň alymlarynyň gelen netijesi Ophthalmology Retina žurnalynda çap edildi.
Wagtlaýyn makulýar degenerasiýa — bu gözüň merkezden görüş ukybyna jogap berýän makula böleginiň zeperlenmegidir. Onuň neowaskulýar görnüşi iň agyry hasaplanylýar we gysga wagtyň içinde görşüň doly ýitmegine getirip bilýär.
Alymlaryň 2008–2017-nji ýyllar aralygyndaky 44 müňden gowrak näsagyň maglumatlaryny seljermekleriniň esasynda metformin dermanyny ulanýan adamlarda bu göz keseliniň ýüze çykma ähtimallygynyň ep-esli pesdigi anyklanyldy. Has gowy tapawut dermanyň umumy möçberi 271 gramdan 600 grama çenli bolan näsaglarda ýüze çykdy.
Häzirki wagtda bu netijeler deslapky maglumatlar hasaplanylsa-da, geljekde bu derman garry adamlaryň görüjilik ukybyny goramakda täze bir usul bolar diýlip garaşylýar.
