Mongoliýanyň premýer-ministriniň orunbasary Ganhýug Hassuýuranyň ýolbaşçylygynda geçirilen mejlisde «Bütindünýä at güni – 2026» halkara çäresiniň resmi nyşany tassyklanyldy. Bu barada MiddleAsianNews neşiri habar berýär.
Bäsleşige 30 sany suratkeşden jemi 63 sany iş gelip gowuşdy. Işçi toparynyň agzalarynyň köpüsi heýkeltaraş Oçirbold Aýuurzanyň döreden «Asman aty» taslamasyny goldadylar.
Mejlisde esasan çäräniň maksatnamasy, şygary, atly ýörişiň ugry we çykdajysy ara alnyp maslahatlaşyldy. Oňa gatnaşmak üçin 15 sany döwlet we jemgyýetçilik guramasyna çakylyk ugradyldy. Çagyrylanlaryň arasynda Türkmenistanyň, Gazagystanyň, Gyrgyzystanyň, Täjigistanyň we Özbegistanyň medeniýet ministrleri hem bar.
Şeýle-de halkara at çapyşyklarynyň düzgünnamasyny taýýarlamak we gatnaşyjylary hasaba almak boýunça hem degişli tabşyryklar berildi.
Bu çäräniň nyşanynyň Mongoliýada saýlanmagy tötänden däldir. Çünki mongollar hem edil türkmenler ýaly, ata diňe jandar hökmünde garaman, eýsem ony wepaly dost we ýaşaýyşda adama zerur bolan gymmatlyklaryň biri diýip kabul edýärler.
Ýeri gelende aýtsak, ýurdumyzda 2026-njy – ýylky ýylynyň «Garaşsyz, baky Bitarap Türkmenistan – bedew batly at-myradyň mekany ýyly» diýlip yglan edilmegi halkymyzyň bedew ata bolan uly hormatynyň nyşanydyr. Şeýle-de her ýylyň aprel aýynyň soňky ýekşenbesinde türkmen bedewiniň milli baýramynyň uly dabara bilen toýlanylýandygyny-da bellemek buýsançlydyr.
