Türkmenistanyň Prezidenti Serdar Berdimuhamedow «Türkmenistanda 2026-njy ýylda şaly öndürmek hakynda» Karara gol çekdi. Bu barada 27-nji martda sanly ulgam arkaly geçirilen Ministrler Kabinetiniň mejlisiniň jemleri boýunça «Watan» habarlar gepleşiginde mälim edildi.
Karara laýyklykda, Oba hojalyk ministrligine, «Türkmengallaönümleri» döwlet birleşigine, Daşoguz we Lebap welaýatlarynyň häkimliklerine bu welaýatlaryň degişli etraplarynda önümçiligi we ekin dolanyşygyny agrotehnikanyň talaplaryna laýyklykda ylmy esasda ýola goýmak arkaly şalynyň bol hasylynyň öndürilmegini üpjün etmek tabşyryldy.
Resminama öndürilýän oba hojalyk önümleriniň möçberlerini has-da artdyrmak, şeýle hem şalynyň ýokary hasylyny almak maksady bilen gol çekildi.
