«Türkmenistan – BMG» strategik maslahat beriş geňeşiniň bäşinji mejlisine taýýarlyk görülýär. Çäre 31-nji marta meýilleşdirildi diýip, wise-premýer, daşary işler ministri Raşid Meredow sanly ulgam arkaly geçirilen Ministrler Kabinetiniň mejlisinde habar berdi. Bu barada «Watan» habarlar gepleşiginde mälim edildi.
Nobatdaky mejlisiň çäklerinde Durnukly ösüş maksatlaryny durmuşa geçirmek boýunça üçünji Meýletin milli synyny taýýarlamak meselesine seretmek göz öňünde tutulýar.
Mejlis Türkmenistanyň ilkinji Meýletin milli synyny taýýarlamak maksady bilen EKOSOC-yň howandarlygynda Nýu-Ýorkda geçirilen Syýasy foruma gatnaşmagy we 2019-njy hem 2023-nji ýyllarda özüniň birinji we ikinji Meýletin milli synlaryny hödürlemegi boýunça alnyp barlan işleri dowam etdirmäge bagyşlanar.
Durnukly ösüş meselelerinden başga-da, gün tertibine metan zyňyndylaryny azaltmak ulgamyndaky hyzmatdaşlyk maksatnamalarynyň taslamalaryny maslahatlaşmak hem girizildi. Bu ädim BMG-niň Howanyň üýtgemegi boýunça Çarçuwaly konwensiýasynyň taraplarynyň 28-nji mejlisiniň dowamynda Ählumumy metan borçnamasyna goşulandan soň, ýurduň öz üstüne alan borçnamalarynyň amaly taýdan durmuşa geçirilmesidir.
Maksatnamanyň aýratyn bölegi halkara ýaşlar hyzmatdaşlygy bolar. Mejlise gatnaşyjylar 2026–2028-nji ýyllar üçin «Ýaşlar, parahatçylyk we howpsuzlyk» maksatnamasynyň taslamasyny maslahatlaşar.
Şunuň bilen baglylykda, öňünden ylalaşylan 2026-njy ýyl üçin birnäçe resminamalar taýýarlanyldy.
Döwlet Baştutany Birleşen Milletler Guramasy bilen hyzmatdaşlygyň yzygiderli ösdürilýändigini nygtady. Prezident geňeşiň nobatdaky mejlisini geçirmek baradaky teklipleri makullady we Raşid Meredowa ony ýokary guramaçylyk derejesinde geçirmegi tabşyrdy.
