26-njy martda Aşgabatda Türkmenistanyň Mejlisi we Birleşen Milletler Guramasynyň Ilat Gaznasy (UNFPA) tarapyndan guralan «Gender deňligini ilerletmek: gender deňligi we gender zorlugyna garşy göreşmekde kanunçylyk esaslaryny berkitmek boýunça Parlamentara dialogy» atly maslahat öz işine başlady. Bu barada Mejlisiň metbugat gullugy habar berýär.
Gepleşikleriň dowamynda parlamentariler şu esasy ugurlar boýunça pikir alşar:
- gender deňligini üpjün etmek we bu ugurda döwlet syýasatyny durmuşa geçirmek;
- halkara hukugyň umumy ykrar edilen kadalaryny milli kanunçylyga ornaşdyrmak we gender aýratynlyklaryny nazara alýan inklýuziw kanunlary kämilleşdirmek;
- gender zorlugyna garşy göreşmek we onuň öňüni almak;
- jemgyýetde durmuş taýdan goraglylyk we jogapkärçilik ulgamlaryny netijeli amala aşyrmak.
Bu maslahat Türkmenistanyň halkara guramalary bilen adam hukuklaryny goramak, esasanam, zenanlaryň jemgyýetdäki ornuny berkitmek ugrundaky hyzmatdaşlygynyň nobatdaky möhüm ädimidir.
