Şu gün Türkmenistanyň Söwda-senagat edarasynyň binasynda oba hojalyk harytlarynyň we azyk senagatynyň «Agro Pack Turkmenistan – 2026» atly halkara sergisi açyldy. Bu ýerde ýerli we daşary ýurtlaryň işewür düzümleriniň 130-a golaýy jemlendi.
Serginiň açylyş dabarasyna Türkmenistanyň Mejlisiniň wekilleri, Hökümet agzalary, ministrlikleriň we pudaklaýyn dolandyryş edaralarynyň, jemgyýetçilik guramalarynyň, diplomatik edaralaryň wekilleri, işewürler we žurnalistler gatnaşdy.
Çäre pudagyň öňdebaryjy ylmy çemeleşmelerini hem-de täzeçil usullaryny görkezmegi maksat edinýär. Halkara sergide Eýran, Belarus, Russiýa, ABŞ, Niderlandrlar, Türkiýe we Özbegistan ýaly ýurtlaryň iri kompaniýalary öz gazanan tejribelerini we mümkinçiliklerini tanyşdyrýar. Önümçilikde we önümleri sarp edijilere ýetirmekde ulanylýan tehnologiýalar, önümleri gaýtadan işlemegiň we gaplamagyň innowasion usullary, şeýle-de taýýar azyk önümleriniň giň görnüşleri hödürlenilýär.
Çärä daşary ýurt kompaniýalary bilen bir hatarda, «Tudana», «Hasar», «Owadan ülke», «Sahabatly», «Erkin Agro» we «Hasyl çeşmesi» ýaly türkmen kärhanalary hem gatnaşýar.
Türkmenistanyň Söwda we daşary ykdysady aragatnaşyklar ministrligi hem-de oba hojalyk toplumynyň düzümleri sergä gatnaşyjylary ýurtda öndürilýän bäsdeşlige ukyply harytlar we eksport mümkinçiliklerini artdyrmak boýunça alnyp barylýan işler bilen tanyşdyrýar.
Şeýle-de, sergi meýdançasynda işewürlik gepleşiklerini geçirmek we täze hyzmatdaşlyk şertnamalaryny baglaşmak üçin ýörite B2B zolagy guraldy.
«Agro Pack Turkmenistan – 2026» halkara sergisi 14-nji maýa çenli dowam eder.
