Türkmenistanyň Halk Maslahatynyň Başlygy Gurbanguly Berdimuhamedow Hytaýyň «CGTN» teleýaýlymynyň alypbaryjysy He Ýanke bilen söhbetdeşlikde türkmen we hytaý halklarynyň arasyndaky özara gatnaşyklaryň taryhy gözbaşy we çuňňur kökleri barada gürrüň berdi.
Türkmen halkynyň Milli Lideri häzirki zaman strategik hyzmatdaşlygyň entek gadymy döwürlerde düýbi tutulan ynam binýadyna daýanýandygyny nygtady.
«Türkmenistan bilen Hytaýyň, biziň halklarymyzyň gatnaşyklaryny dogruçyl beýan etmek üçin onuň taryhy esaslaryny bilmek we olara düşünmek gerek. Bu gatnaşyklaryň arasy hiç haçan üzülmedi, ol köp asyrlaryň dowamynda aýratyn geografik, syýasy, ykdysady we medeni giňişligi döretdi. Bu giňişlikde türkmenler hem-de hytaýlar bilelikde ýaşap, özara gatnaşyk etdiler. Tejribe topladylar, däp-dessurlaryny kemala getirdiler. Bilimlerini, endiklerini, ruhy we maddy gymmatlyklaryny paýlaşdylar. Munuň özi iki ýurduň hem-de olaryň halklarynyň häzirki hyzmatdaşlygynyň derejesini, many-mazmunyny has-da berkitdi. Şoňa görä-de, Türkmenistan bilen Hytaýyň arasyndaky dostluk, hoşniýetli goňşuçylyk we özara ynanyşmak däpleri kanunalaýyk ýagdaý boldy. Biz muňa buýsanýarys».
Gurbanguly Berdimuhamedow «Kasam şertnamasynyň» ähmiýetini aýratyn belledi. Bu resminama biziň eýýamymyzdan ozalky 49-njy ýylda türkmenleriň ata-babalary bilen Hytaýyň halkynyň arasynda baglaşylypdyr. Halk Maslahatynyň Başlygynyň nygtamagyna görä, bu resminama şu günki günde-de Beýik Ýüpek ýolunyň däplerini dikeltmek işinde iki döwletiň ýolbaşçylary üçin ruhy ugur görkeziji bolup hyzmat edýär.
