Türkmenistanyň Prezidenti Serdar Berdimuhamedow «Galkynyş» äpet gaz käniniň dördünji tapgyryny senagat taýdan özleşdirmek hakyndaky Karara gol çekdi. Bu barada «Watan» habarlar gepleşiginde mälim edildi.
Döwlet Baştutanynyň 20-nji martda sanly ulgam arkaly geçiren Ministrler Kabinetiniň mejlisinde bellenilişi ýaly, bu resminama ýurduň gaz pudagyny ösdürmäge we eksport mümkinçiliklerini giňeltmäge gönükdirilendir.
Mejlisiň dowamynda Ministrler Kabinetiniň Başlygynyň orunbasary G.Agajanow Türkmenistanyň nebitgaz toplumynyň ýolbaşçylarynyň Hytaýyň Milli nebitgaz korporasiýasynyň (CNPC) wekilleri bilen geçiren duşuşyklarynyň netijeleri barada hasabat berdi. Gepleşikler Halk Maslahatynyň Başlygy Gurbanguly Berdimuhamedowyň Hytaý Halk Respublikasyna amala aşyran saparynyň çäklerinde geçirildi. Wise-premýeriň sözlerine görä, taraplar gaz pudagyndaky hyzmatdaşlygy mundan beýläk-de ösdürmegiň meselelerini ara alyp maslahatlaşdylar.
Halk Maslahatynyň Başlygynyň ýolbaşçylygyndaky Türkmenistanyň wekiliýetiniň Hytaýa bolan saparynyň ikitaraplaýyn hyzmatdaşlygy ösdürmekde uly ähmiýete eýe bolandygyny bellemek bilen, Döwlet Baştutany saparyň çäklerinde gaz pudagy boýunça möhüm ylalaşyklaryň gazanylandygyny nygtady. Şeýle hem bu taslamanyň durmuşa geçirilmeginiň tebigy gazyň çykarylyşyny artdyrmaga we täze iş orunlaryny döretmäge ýardam etjekdigi bellenildi.
Ýatlap geçsek, mundan ozal CNPC korporasiýasy taslamanyň dördünji tapgyryny amala aşyrmak boýunça halkara tenderde ýeňiji bolupdy. «Galkynyş» känini senagat taýdan özleşdirmek jemi ýedi tapgyrda meýilleşdirilýär. Häzirki wagtda aslamanyň birinji tapgyry ulanmaga berlip, ýylda 30 milliard kub metr gaz arassalamaga ukyply bolan üç sany gaz işleýän zawod gurlup ulanmaga berildi.
«Galkynyş» käni Hytaýa ugradylýan gazyň we gurluşygy dowam edýän, ýyllyk kuwwaty 33 milliard kub metr bolan Türkmenistan — Owganystan — Päkistan — Hindistan (TOPH) gaz geçirijisiniň esasy çig mal binýady hasaplanýar. Häzirki wagtda Türkmenistan — Hytaý gaz geçirijisiniň üç şahasy (A, B we C) arkaly her ýyl takmynan 40 milliard kub metr gaz ugradylýar. Dördünji şahanyň (D liniýasynyň) işe girizilmegi bilen, iberilýän gazyň möçberini ýylda 65 milliard kub metre çenli ýetirmek göz öňünde tutulýar.
