18-nji martda Türkmenistanyň daşary işler ministriniň orunbasary Mähri Bäşimowa Birleşen Milletler Guramasynyň Bosgunlaryň işi boýunça Ýokary komissarynyň müdirliginiň (UNHCR) Merkezi Aziýa boýunça sebit wekili Mahir Safarly bilen duşuşyk geçirdi.
Duşuşygyň başynda M. Safarly bu wezipä bellenilmegi baradaky hatyny gowşurdy. M.Bäşimowa oňa bu jogapkärli işinde üstünlikleri arzuw etdi.
Gepleşikleriň dowamynda taraplar Türkmenistanyň UNHCR bilen hyzmatdaşlygynyň häzirki ýagdaýyny we geljegini ara alyp maslahatlaşdy. Ýurduň bosgunlary we raýatlygy bolmadyk adamlary goramak babatda halkara borçnamalaryna ygrarlydygy bellenildi.
Türkmenistanyň raýatsyzlygy aradan aýyrmakda gazanan üstünliklerine, şol sanda 2019–2024-nji ýyllar üçin Hereketleriň milli meýilnamasynyň durmuşa geçirilmegine we Sebitleýin ministrler maslahatynyň netijelerine aýratyn üns berildi.
Söhbetdeşler Türkmenistanyň ählumumy başlangyçlara gatnaşmagy, şol sanda Raýatsyzlygyň aradan aýrylmagy boýunça Ählumumy bileleşige goşulmagy we Bosgunlaryň meseleleri boýunça ählumumy forumlaryna gatnaşmagy bilen bagly meselelere seretdi.
Mundan başga-da, Türkmenistanyň 2028-nji ýyly «Halkara hukugyň ýyly» diýip yglan etmek baradaky başlangyjy barada pikir alşyldy.
Duşuşygyň ahyrynda taraplar sebitdäki ynsanperwer meseleler boýunça garaýyşlaryny beýan etdi we häzirki döwür üçin bilelikdäki çäreleriň meýilnamasyny işläp düzmek meselelerini maslahatlaşdy.
