Şwesiýanyň Garpenberg şäherinde ýeriň takmynan 1100 metr çuňlugynda geçirilen ylgaw ýaryşy dünýäniň iň çuň ýerasty marafony hökmünde resmi taýdan Ginnesiň rekordlar kitabyna hasaba alyndy.
Marafonyň uzynlygy adaty ölçegde, ýagny 42,2 km boldy. Trassanyň iň pes nokady bolsa ýeriň 1118 metr aşagynda ýerleşdi. Gatnaşyjylar badalga çyzygyna ýetmek üçin liftde takmynan 3 minut aşak düşmeli boldular.
Bu çuňluk Beýik Britaniýanyň iň belent nokady bolan Ben-Newis dagynyň we dünýäniň iň uly şaglawuklarynyň biri bolan Wenesueladaky Anhel şaglawugynyň beýikligi bilen deňdir.
Aslynda bu ýaryş geçen ýylyň oktýabr aýynda geçirilipdi, emma Ginnesiň rekordlar kitaby ony diňe häzir resmi taýdan hasaba aldy. Rekord goýlan ýaryşa 18 ýurtdan 55 sany türgen gatnaşdy. Ýeriň aşagy bütinleý garaňky bolany üçin, türgenler ýörite kellä dakylýan çyralary ulandylar.
Gatnaşyjylaryň biri ýaryşyň şertleri hakynda:«Ylgaw geçen ýer örän yssy, çygly hem az-kem tozanly. Ýöne özümizi gowy duýduk» diýip, gürrüň berdi.
Marafon 11 aýlawdan ybarat bolup, onuň dowamynda haýyr-sahawat maksatlary üçin 1 million dollar töweregi serişde toplandy. Ýaryşy BecomingX, ICMM we Boliden kompaniýalary gurady.
Mundan öňki şeýle görnüşli rekord Germaniýanyň Sondershauzen şahtasynda 2002-nji ýyldan bäri geçirilip gelinýän «Crystal Mine Underground Marathon» ýaryşyna degişlidi.
