Parallels programma üpjünçiligini işläp düzüjiler wirtual maşyn arkaly Windows 11 operasion ulgamyny arzan MacBook Neo noutbugynda işledip bolýandygyny habar berdi.
Olaryň berýän maglumatlaryna görä, «Parallels» programmasy enjama bökdençsiz gurnalýar, wirtual maşynlar bolsa durnukly işleýär. Häzirlikçe diňe başlangyç synaglar geçirildi, has düýpli barlaglar we optimallaşdyryş işlerine ýakyn hepdelerde garaşylýar.
Mundan ozal hünärmenlerde A18 Pro prosessory boýunça käbir soraglar bardy. Adatça, macOS üçin niýetlenen gurallar M seriýaly çipler üçin optimallaşdyrylýar. iPhone-larda ulanylýan A-çipler hem ARM arhitekturasyny ulanýan bolsa-da, olaryň apparat wirtualizasiýasyny goldaýandygy näbellidi. Synaglar A18 Pro prosessorynyň «Parallels Desktop» arkaly wirtual maşynlary işletmek üçin zerur funksiýalarynyň bardygyny görkezdi.
Kompaniýa MacBook Neo-da Windows-yň MacBook Air ýa-da Pro modellerine garanyňda has haýal işlemeginiň mümkindigini belleýär. Munuň esasy sebäbi — operatiw ýadynyň (RAM) 8 GB möçberinde bolmagydyr. Windows wirtual usulda işledilende takmynan 4 GB ýady ulanýar, şonuň üçin hem serişdeler Windows we macOS arasynda paýlanylýar.
Işläp düzüjiler bu enjamda ýönekeý we uly güýç talap etmeýän programmalary ulanmagy maslahat berýärler.
Öz wagtynda Windows 8-iň işlenip düzülmegine ýolbaşçylyk eden Microsoft-yň öňki wise-prezidenti Stiwen Sinofski şahsy ulanmagy üçin MacBook Neo satyn alandygyny we ondan «örän täsirlenendigini» aýtdy. Ol Apple kompaniýasyny «ýene bir gezek ajaýyp önüm döredendigi» bilen gutlady.
Onuň sözlerine görä, Neo iş wezipelerini gowy ýerine ýetirýär, pes öndürijilik we 8 GB operatiw ýat ýaly kemçilikler bolsa doly kabul ederliklidir.
