Microsoft we Ericsson kompaniýalary emeli aň goldawy bolan Windows 11 operasion ulgamly kompýuterlerde 5G tehnologiýalaryny has çuňňur integrasiýa etmek boýunça bilelikde işleýändiklerini yglan etdiler. Täze başlangyç korporatiw noutbuklarda mobil ulgamlary ulanmagy ýönekeýleşdirmäge gönükdirilendir.
Taslama IT-toparlar üçin enjamlary dolandyrmagyň bulut platformasy bolan Microsoft Intune bilen Ericsson Enterprise 5G Connect platformasyny birleşdirmegi göz öňünde tutýar. Bu bolsa Ericsson-yň 5G mümkinçiliklerini göni Windows 11-iň içine ýerleşdirmäge şert döreder. Hyzmatdaşlygyň ilkinji netijeleri 5G goldawy bolan Surface noutbuklarynda elýeterli bolar.
"Emeli aň goldawy bolan 5G noutbuklary işläp taýýarlama usullarymyzy we ýerimizi üýtgedýär. Microsoft we öňdebaryjy bulut hyzmatlaryny üpjün edijiler bilen bilelikde, biz guramalara ýerleşýän ýerine garamazdan, goralan we hemişelik birigip duran enjamlaryň ulanyşa girizilmegini we işledilmegini bökdençsiz awtomatlaşdyrmaga mümkinçilik berýäris. Bu emeli aň döwri üçin has akylly we çeýe iş ýerini döredýär. Bu bilelikdäki çözüm bütin dünýäde korporatiw IT-ulgamlaryny we işgärleriň iş usullaryny düýpli üýtgedip biler" diýip, Ericsson belledi.
Çözgüdiň esasy mazmuny — enjamlaryň SIM-kartlary el bilen çalşyrmazdan, iň amatly 5G ulgamyna (ofisdäki hususy ulgama ýa-da ýoldaky köpçülikleýin ulgama) awtomatiki ýagdaýda birigip biljekdigindedir. Ulgamlaryň çalşylmagy arka planda amala aşyrylar, bu bolsa işgärlere ulgam sazlamalaryny düzüp oturmazdan we birikme meselelerini çözmezden elmydama aragatnaşykda galmaga mümkinçilik berer.
