Şu gün, 17-nji martda Türkmenistanyň söwda-senagat edarasynda giň gerimli sergi öz işine başlady. Bu sergi Türkmenistanyň Senagatçylar we telekeçiler birleşmesiniň döredilmeginiň 18 ýyllygyna bagyşlanýar.
Serginiň açylyş dabarasyna Mejlisiň Başlygy, Ministrler Kabinetiniň Başlygynyň orunbasarlary, ministrlikleriň we pudaklaýyn edaralaryň ýolbaşçylary, KHBS-iň wekilleri, diplomatik wekilhanalaryň we halkara guramalaryň wekilleri gatnaşdy.
Çäre ykdysadyýetiň dürli pudaklaryna degişli «Arkadag Medisina Klasteri Menejment», «Ak gaýa», «Aýdyň gijeler», «Täze Aý», «Hasar» we «Derýa plastik» ýaly 100-den gowrak kompaniýadyr kärhanalary bir ýere jemledi. Sergi olaryň soňky ýyllarda gazanan üstünliklerini, innowasion önümlerini hem-de durmuşa geçirýän iri taslamalaryny görkezmek üçin netijeli meýdança öwrüldi.
Sergide azyk senagaty, dokma we ýeňil senagat, gurluşyk serişdeleri, derman senagaty, maldarçylyk we senetçilik ýaly ugurlar boýunça ýokary hilli, bäsdeşlige ukyply we eksport ugurly önümler görkezilýär.
Sergi bilen utgaşyklykda 18-nji martda «Türkmenistanyň geljegine maýa goýumlar» atly halkara forum hem geçiriler. Onda geljekki meýilnamalar, daşary ýurt maýa goýumlaryny çekmek we täze hyzmatdaşlyklary ýola goýmak meseleleri ara alnyp maslahatlaşylar. Forumyň dowamynda ikitaraplaýyn duşuşyklaryň we işewür gepleşikleriň hem geçirilmegine garaşylýar.
Sergi öz işini 19-njy martda tamamlar. Bu çäreler ýurduň hususy pudagynyň geljekki ösüşlerine itergi berip, işewürlik gatnaşyklaryny pugtalandyrmaga we ýurduň ykdysady kuwwatynyň artmagyna ýardam eder.
