16-njy martyň säheri Kaliforniýadaky 98-nji Oskar baýraklaryny gowşuryş dabarasy bilen başlandy. Aslynda köpçülik bu dabara kino baýraklaryny kimiň alýandygyny bilmek üçin üýşen bolsa-da, olar gözlerini gyzyl halyçadan ýörän ýyldyzlaryň lybaslaryndan aýryp bilmediler. Hakykatdan hem baýraga dalaşgärler, geçen ýyllaryň ýeňijileri we dünýä ýyldyzlary bu üýşmeleňe dogumlylyk bilen iň haýran galdyryjy eşikleri geýip geldiler.
Şolaryň hatarynda 63 ýaşly Demi Muruň Gucci-den birgiden per bilen bezelen lybasy geýip, hemmeleriň ünsüni çekdi. Bu köýnek onuň keşbine bir wagtyň özünde ýelege meňzeş ýeňillik bilen biraz drama hem goşup goýberdi. El Fanning bolsa köpüň öňüne täze ýyglan bahar gülleriniň çemenini ýatladýan, näzik gül nagyşly, hut şazada gyzlaryň stilindäki ak köýnegi geýip çykdy.
Maşgala – kiçijek döwlet. Şonuň üçin model Kaýli Jenner öz ýoldaşy Timoti Şalameni goldamak üçin Schiaparelli brendiniň ýeňiş reňkli gyzyl köýneginde geldi. Timoti Şalame hem oňa nusgawy ak smoking bilen jogap berdi. Enn Hetueýem öz gezeginde, Valentino-nyň güller bilen bezelen gara köýneginiň üstünden göwher baryny dakynyp, hakyky zenan ýaly, owadan hem kaşaň geýinmekden lezzet alýandygyny bildirdi.
Bu ýylky Oskaryň lybaslarynda sadalyk we minimalizme üns berenlerem az bolmady. Meselem, Kirsten Danst we Renata Reinswe Celine hem-de Louis Vuitton markalaryndan saýlan nepis lybaslarynyň kömegi bilen, artyk-süýşük bezegsiz, öz syrdam syratlary bilen owadandyklaryny subut etdiler. «Iň oňat zenan keşbi» ugrundaky baýragyň ýeňijisi bolan Jessi Bakli bolsa Chanel köýneginde bägül bilen gülgüne reňkleri sazlap, egni açyk nysak bilen beýlekilerden saýlandy.
Garaz gyzyl halyçadaky her bir ädim kiçijik bir spektakla öwrüldi. Tomaşaçylar oňa tomaşa etse, fotohabarlarçylar ýyldyzlaryň lybaslarynyň lowurdysyndan başlap, gymmat bahaly bezegleriniň öwüşginlerine çenli ýekeme-ýeke surata düşürmekden ýadamadylar.
