16-njy martda Türkmenistanyň Prezidenti Serdar Berdimuhamedow wise-premýer T.Atahallyýewiň we welaýat häkimleriniň gatnaşmagynda iş maslahatyny geçirdi. Duşuşykda möwsümleýin oba hojalyk işleri we sebitlerdäki häzirki wezipeler ara alnyp maslahatlaşyldy diýip, «Watan» habarlar gepleşiginde habar berildi.
Bäş welaýatyň häkimleri we wise-premýer gezekli-gezegine bugdaýa ideg edilişi barada hasabat berdi. Häzirki wagtda meýdanlarda ösüş suwuny tutmak we mineral dökünler bilen iýmitlendirmek işleri alnyp barylýar. Şol bir wagtyň özünde gowaça ekişine taýýarlyk görülýär: ýerleri taýýarlamak boýunça zerur çäreler görülýär, ýokary hilli tohumlary we oba hojalyk tehnikalaryny möwsüme taýýarlamak işleri tamamlanýar. Ýazky ýeralma we gök-bakja ekinleri ekilen meýdanlarda hem işler dowam edýär.
Şeýle-de, häkimler ýazky bag ekmek möwsümine we ählihalk bag ekmek dabarasyna, şonuň bilen birlikde Milli bahar baýramyna — Halkara Nowruz gününe bagyşlanan çärelere görülýän taýýarlyklar barada hasabat berdi.
Prezident Serdar Berdimuhamedow hasabatlary diňläp, agrotehniki kadalaryň berk berjaý edilmeginiň zerurdygyny nygtady we ähli oba hojalyk işleriniň öz wagtynda geçirilmegine gözegçilik etmegi tabşyrdy.
Döwlet Baştutany ýazky bag ekmek möwsümine we ählihalk bag ekmek dabarasyna gowy taýýarlyk görmegi tabşyrdy. Nowruz baýramynyň öňüsyrasynda döwlet Baştutany sebitlerdäki çäreleriň ýokary guramaçylyk derejesinde geçirilmegini üpjün etmegi buýurdy. Prezident baýramçylyk günlerinde bazarlaryň we dükanlaryň ähli zerur harytlar bilen üpjün edilmegine gözegçilik etmegi tabşyrdy.
