Häzirkizaman amerikan kino sungatynyň ykrar edilen klassygy Pol Tomas Anderson «Iň gowy režissýor» kategoriýasynda ilkinji gezek «Oskar» baýragyny aldy. Ol bu baýraga «Bir söweşden soň beýleki» (Битва за битвой) filmi üçin mynasyp görüldi.
Amerikan kino sungaty we ylymlar akademiýasynyň 98-nji baýrak gowşurylyş dabarasy 16-njy martda irden Los-Anjelesde geçirildi.
«Iň gowy režissýor» nominasiýasynda Anderson bilen bilelikde Hloýa Çžao («Hamnet: Gamlete ylham beren hekaýat»), Joş Sefdi («Marti Beýik»), Ýoakim Trier («Sentimental gymmatlyk») we Raýan Kugler («Günäliler») dalaş etdi.
Mundan ozal režissýor 11 gezek «Oskar» baýragyna hödürlenipdi, emma bir gezek hem ýeňiji bolmandy. «Bir söweşden soň beýleki» filmi üçin gazanylan ýeňiş onuň üçin ilkinji boldy. Bu film onuň režissýorlyk karýerasyndaky onunjy filmidir. Şeýle hem Anderson bu film üçin «Iň gowy film» we «Iň gowy adaptirlenen ssenariý» ugrundaky baýraklary hem aldy.
«Bir söweşden soň beýleki» atly satiriki uruşly film Tomas Pinçonyň «Waýnlend» romanyna esaslanýar we öňki çepçi radikal Pet (Leonardo Di Kaprio) barada gürrüň berýär. 16 ýyldan soň, ol gyzyny öňki duşmany bolan polkownik Lokjodan (Şon Penn) goramaga mejbur bolýar. Film alternatiw Amerikada dönüklik, diri galmak ugrundaky göreş we syýasy ekstremizm temalaryny gozgaýar.
Umuman alanyňda, «Bir söweşden soň beýleki» filmi hödürlenen 13 nominasiýasynyň 6-sy boýunça «Oskar» baýragyny almagy başardy.
