Tesla kompaniýasynyň sürüjisiz dolandyrylýan Cybercab awtomobillerinde görüjilik ukyby peselen ýa-da doly ýitiren adamlar üçin Braýl elipbiýindäki ýazgylar bolar. Bu barada robotaksi taslamasynyň baş inženeri habar berdi.
Hünärmeniň aýtmagyna görä, taktil (el bilen syzylýan) ýazgylar gapylary açýan içerki tutawaçlarda we duýduryş çyrasynyň düwmesinde ýerleşdiriler. Bu düwme, şol bir wagtyň özünde, ulagy gyssagly saklamak wezipesini hem ýerine ýetirýär.
Mundan ozal kompaniýa Cybercab-yň göwrüminiň kiçidigine garamazdan, beýleki Tesla modellerinden has giň aýak goýulýan ýeriniň bardygyny mälim edipdi.
Dron operatory Jo Tegtmaýer tarapyndan Tesla kärhanasynyň çäginde düşürilen täze wideolarda sürüjisiz taksiniň kameralaryny arassalaýyş ulgamynyň işleýşi görkezilýär. Şeýle-de, Giga Texas poligonynda dolandyryş ruly we gapdal yzy görkezýän aýnalary bolmadyk birnäçe Cybercab ulaglary-da göründi. Bu awtomobilleriň häzirki wagtda kraş-testlere (çaknyşyk synaglaryna) taýýarlanylýandygy aýdylýar.
Tesla täze ulagyny 2026-njy ýylyň ahyryna çenli satuwa çykarmagy meýilleşdirýär. Deslapky çaklamalara görä, täze modeliň bahasy 30 müň dollardan arzan bolar.
