Türkmenistanyň ýokary okuw mekdepleri aprel aýynda birnäçe halkara ylmy-amaly maslahatlaryny we olimpiadalaryny geçirmäge taýýarlyk görýär. Bu barada anna güni geçirilen Ministrler Kabinetiniň nobatdaky mejlisinde wise-premýer B.Mämmedowa hasabat berdi diýip, «Watan» habarlar gepleşiginde habar berildi.
Hususan-da, geljek aýda şu aşakdaky çäreleri geçirmek meýilleşdirilýär:
- Türkmen döwlet bedenterbiýe we sport institutynda Bütindünýä saglyk güni mynasybetli «Garaşsyz, hemişelik Bitarap Türkmenistan — halkara sport hyzmatdaşlygynyň we sagdynlygyň mekany» atly halkara ylmy-amaly maslahaty;
- Türkmen döwlet ykdysadyýet we dolandyryş institutynda «Makroykdysadyýet» dersi boýunça IV Açyk halkara internet olimpiadasy hem-de «Maliýe bazarlarynyň ösüşiniň häzirki zaman meýilleri» atly III halkara ylmy-amaly maslahaty;
- Döwletmämmet Azady adyndaky Türkmen milli dünýä dilleri institutynda iňlis dili boýunça V halkara internet olimpiadasy, şeýle hem «Ýaşlaryň ylmy gözlegleri» we «Daşary ýurt dillerini okatmagyň dünýä we milli tejribesi: ylmy gözlegler we täze garaýyşlar» atly maslahatlar;
- Magtymguly adyndaky Türkmen döwlet uniwersitetinde «Taryhy we medeni mirasy öwrenmekde häzirki zaman ylmy barlaglar: halklaryň we medeniýetleriň durnukly ösüşi» atly halkara ylmy-amaly maslahaty;
- Ýagşygeldi Kakaýew adyndaky Halkara nebit we gaz uniwersitetinde informatika boýunça IV Halkara açyk internet olimpiadasy;
- Myrat Garryýew adyndaky Türkmenistanyň Döwlet lukmançylyk uniwersitetinde «Häzirki zaman oftalmologiýanyň wajyp meseleleri» atly halkara maslahaty;
- Türkmen oba hojalyk institutynda «Oba hojalygynda tebigy baýlyklary rejeli peýdalanmak» atly II halkara ylmy-amaly maslahaty.
Bu çärelere diňe bir türkmen ýokary okuw mekdepleriniň talyplarynyň, mugallymlarynyň we alymlarynyň däl, eýsem daşary ýurtlaryň öňdebaryjy bilim edaralarynyň wekilleriniň hem gatnaşmagyna garaşylýar.
Prezident Serdar Berdimuhamedow zehinli ýaşlary ýüze çykarmagyň we bilim ulgamynda halkara hyzmatdaşlygy berkitmegiň möhümdigini nygtady. Döwlet Baştutany hödürlenen teklipleri makullady we wise-premýere bu çäreleriň ýokary hilli amala aşyrylmagyny üpjün etmegi tabşyrdy.
