Ministrler Kabinetiniň mejlisinde Milli bahar baýramyny — Halkara Nowruz gününi ýokary derejede dabaralandyrmak boýunça görülýän taýýarlyk işlerine üns berildi. Bu barada «Watan» habarlar gepleşiginde mälim edildi.
Wise-premýer B.Seýidowa esasy baýramçylyk dabaralarynyň Ahal welaýatynyň Ak bugdaý etrabyndaky «Nowruz ýaýlasynda» geçiriljekdigi barada hasabat berdi. Baýramçylyk dabarasy Halk Maslahatynyň Başlygy Gurbanguly Berdimuhamedowyň we Prezident Serdar Berdimuhamedowyň eserleriniň, şeýle hem bu baýram bilen baglanyşykly milli däp-dessurlaryň esasynda taýýarlanylan medeni-köpçülikleýin çäreler bilen badalga alar.
Dabaralaryň çäginde döredijilik toparlarynyň çykyşlaryna, türkmen halkynyň ekerançylyk, maldarçylyk, bagbançylyk we senetçilik däplerini şöhlelendirýän çykyşlara hem-de sahnalaşdyrylan oýunlara uly orun berler. Maşgala däp-dessurlarynyň görkezilmegine we sungat ussatlarynyň baýramçylyk konsertine aýratyn üns berler.
Döwlet Baştutany hasabaty diňläp we hödürlenen tekliplere garap, wise-premýere ähli meýilleşdirilen çäreleriň düýpli taýýarlanylmagyny we olaryň ýokary guramaçylyk derejesinde geçirilmegini üpjün etmegi tabşyrdy.
