2026-njy ýylyň 11-nji martynda Türkmenistanyň Mejlisiniň Başlygy D. Gulmanowa Halkara Zähmet Guramasynyň Ýewropa we Merkezi Aziýa boýunça sebitleýin direktory jenap Peter wan Roý bilen duşuşyk geçirdi. Bu barada Mejlisiň metbugat gullugy habar berýär.
Gepleşikleriň dowamynda Türkmenistanyň alyp barýan içeri we daşary syýasatynyň, şeýle-de BMG-niň çäklerinde öňe sürýän başlangyçlarynyň halkara ähmiýeti bellenildi. Ýurduň halkara hukugynyň kadalaryna ygrarlylygy nygtalyp, BMG-niň düzüm birlikleri we Halkara Zähmet Guramasy bilen hyzmatdaşlygynyň esasy ugurlary ara alnyp maslahatlaşyldy.
Duşuşykda Türkmenistanyň Hökümeti bilen Halkara Zähmet Guramasynyň arasyndaky hyzmatdaşlyk boýunça 2024-2025-nji ýyllar üçin «Ýol kartasynyň» çäklerinde ýerine ýetirilen işleriň netijelerine we 2026-njy ýyl üçin meýilleşdirilen täze çärelere aýratyn üns berildi. Türkmen tarapy milli kanunçylyk binýadyny kämilleşdirmek, adam hukuklaryna, çagalaryň hukuklaryna we ilatyň durmuş goraglylygyna degişli kanunçylyk namalaryny döwrebaplaşdyrmak boýunça alnyp barylýan işler barada maglumat berdi.
Jenap Peter wan Roý ýurduň bu ugurda gazanan netijelerine ýokary baha berip, ýakyn geljekde özara bähbitli hyzmatdaşlyga bolan garaýyşlaryny beýan etdi.
