Amerikaly aýdymçy Teýlor Swiftiň baýlygy soňky aýlarda 400 million dollar artdy. «Forbes» žurnalynyň täze maglumatlaryna görä, onuň umumy baýlygy 2 milliard dollara ýetdi.
Aýdymçy «Forbes World’s Celebrity Billionaires» sanawynda ýedinji orny eýeleýär. Bu sanawa baýlygyny miras alman, öz esasy işi bilen milliarder derejesine ýeten meşhur şahsyýetler girizilýär.
Swiftiň kapitalynyň esasy çeşmesi onuň aýdym-saz katalogy boldy. Neşir ony, takmynan, 900 million dollar bilen bahalandyrýar. Şeýle-de, 2024-nji ýylyň ahyrynda tamamlanyp, aýdym-saz taryhynda iň girdejili konsert syýahatyna öwrülen «The Eras Tour» hem bu baýlyga uly goşant goşdy.
Aýdym-sazdan gelýän girdejilerden başga-da, aýdymçynyň aktiwleriniň hatarynda bahasy 100 million dollar töweregi bolan gozgalmaýan emläk toplumy bar. «Forbesiň» sanawynda Swift repçi Jay-Z (2,8 milliard dollar) bilen Brýus Springstiniň (1,2 milliard dollar) arasynda ýerleşdi. Sanawyň ýene bir belli şahsyýeti — baýlygy 1 milliard dollara ýeten we bu sanawa ilkinji gezek goşulan Beýonsedir.
Swiftiň 2025-nji ýylyň oktýabrynda çykan «The Life of a Showgirl» atly täze albomy dünýäde iň köp satylan albomlaryň biri boldy. Bu albomyň esasy aýdymy bolan «The Fate of Ophelia» Billboard Hot 100 sanawynda 10 hepdeläp birinji orunda saklandy, bu bolsa aýdymçynyň karýerasynda ähli aýdymlar üçin rekord görkezijidir.
