10-njy martda Türkmenistanyň Daşary işler ministrliginiň Halkara gatnaşyklary institutynda «Zenan diplomatlaryň jemgyýetdäki orny we olaryň ýeten sepgitleri» atly interaktiw dialog geçirildi. Türkmenistanyň DIM-iniň metbugat gullugynyň habar bermegine görä, bu çäre Merkezi Aziýa ýurtlarynyň ýaş diplomatlary we döwlet gullukçylary üçin guralan ikinji okuw maslahatynyň çäklerinde amala aşyryldy.
Dialog BMG-niň Türkmenistandaky Hemişelik utgaşdyryjysynyň wekilhanasy bilen bilelikde guraldy. Oňa halkara guramalaryň ýurtdaky wekilhanalarynyň we halkara düzümleriň zenan işgärleri, Daşary işler ministrliginiň wekilleri, institutyň mugallymlary we talyp gyzlary gatnaşdy.
Duşuşykda Türkmenistanyň daşary işler ministriniň orunbasary Mähri Bäşimowa, Palestina Döwletiniň Türkmenistandaky ilçisi Rana Abu Hijleh, Pakistan Yslam Respublikasynyň Türkmenistandaky ilçisi Farýal Legari, BMG-niň Ösüş maksatnamasynyň Türkmenistandaky Hemişelik wekili Narine Saakýan, şeýle hem ÝUNESKO-nyň işleri barada Türkmenistanyň Milli toparynyň jogapkär kätibi Çynar Rüstemowa çykyş etdi.
Çykyş edenler Türkmenistanyň hemişelik Bitaraplyk syýasatynyň parahatçylyk söýüjilikli başlangyçlary öňe sürmekdäki we halkara gatnaşyklarynda ynamdar dialogy ösdürmekdäki ähmiýetini belledi. Ýurduň Bitaraplygyna esaslanýan «Dialog — parahatçylygyň kepili» ýörelgesiniň zenanlaryň diplomatiýadaky ornuny hem-de olaryň sebitde parahatçylygy berkitmäge gönükdirilen başlangyçlaryny goldaýandygy nygtaldy.
Şeýle hem zenanlaryň döwlet dolandyryşyndaky we halkara hyzmatdaşlygyndaky hünär işjeňliginiň dünýäniň durnukly ösüşine täsir edýändigi bellenildi.
Okuw maslahaty gatnaşyjylaryň arasynda tejribe alyşmak we Bitarap Türkmenistanyň diplomatiýasynda zenanlaryň tutýan ornuny maslahatlaşmak üçin möhüm meýdança boldy.
