Ilon Maskyň xAI emeli aň kompaniýasy adaty teksti täsirli sözleýişe öwürýän täze guraly tanyşdyrdy. Başlangyç tapgyrda bäş sany ses elýeterli bolup, olar «Eve», «Ara», «Rex», «Sal» we «Leo» diýlip atlandyrylýar.
Bu ulgam duýgulary we äheňi gönümel tekstiň içinde dolandyrmaga mümkinçilik berýär. Ulanyjy tekst ýazylan wagty oňa ýörite görkezmeleri — dyngylary, gülkini ýa-da beýleki elementleri goşup bilýär.
Tekstde «[pause]» (dyngy) ýa-da «[laughter]» (gülki) ýaly buýruklary, şeýle hem ýörite tegleri ulanmak bolýar. Meselem, <whisper></whisper> tegi sözlemi pyşyrdy bilen aýtdyryp, <slow></slow> tegi bolsa sözleýişi haýalladyp bilýär. Ulanyjylaryň ilkinji synlaryna görä, ulgam goşmaça sazlamasyz dyngylary, gülkini, üflemeleri we dem alşy, şeýle hem sesiň belent-pesligini hem gürleýiş tizligini takyk gaýtalaýar.
Hyzmatyň API-si «WebSocket» tehnologiýasy bilen üpjün edilen. Bu bolsa sesi hakyky wagt tertibinde bermäge şert döredýär. Ulgam MP3 we «mu-law» ýaly dürli audio formatlar bilen işlemäge-de ukyplydyr.
