Ilon Maskyň SpaceX kompaniýasy ABŞ-nyň Gymmatly kagyzlar we biržalar komissiýasyna ilkinji gezek köpçülige paýnama hödürlemegi (IPO) geçirmek üçin gizlinlik bilen arza berdi. Bu barada çeşmelere salgylanýan Bloomberg habar berýär.
Agentligiň berýän maglumatyna görä, sanawa (kompaniýanyň paýnamalaryny birža söwdasyna goýbermek üçin biržanyň açyk söwda edilýän paýnamalarynyň sanawyna goşmak) goşmak iýun aýynda geçiriler. Paýnamalaryň anyk sanyny we baha aralygyny biraz soňrak mälim edilmek meýilleşdirilýär.
Çeşmeleriň biri kompaniýanyň IPO wagtynda 1,75 trillion dollardan gowrak gymmata eýe bolup biljekdigini, jemi toplanan serişdeleriň bolsa 75 milliard dollara ýetmeginiň mümkindigini aýtdy. Eger bu çaklama tassyk bolsa, teklip taryhdaky iň uly teklip bolar.
Öňki rekord 2019-njy ýylda 29 milliard dollar toplan Saudi Aramco kompaniýasyna degişlidi.
SpaceX kompaniýasynyň wekili bu maglumata düşündiriş bermekden ýüz öwürdi.
SpaceX kosmos tehnikasyny öndürmek we Starlink hemra aragatnaşyk ulgamyny ösdürmek bilen meşgullanýan amerikan aerokosmos kompaniýasydyr. 2026-njy ýylyň fewral aýynda ol Ilon Maskyň X sosial ulgamyny öz içine alýan emeli aň startapy xAI-ny satyn aldy. Şonda birikdirilen kompaniýanyň bahasy 1,25 trillion dollara deň boldy.
