Brent markaly nebitiň bahasy gymmatlap, soňky takmynan üç ýylyň içinde ilkinji gezek bir barel üçin 120 dollar derejesine golaýlady.
Dynç günlerinden soň Aziýadaky ilkinji söwdalarda bir barel Brent nebitiniň bahasy 109 dollara çenli ýokarlandy. Söwdalaryň dowamynda onuň bahasy 119,5 dollara ýetdi.
«Bloomberg» agentliginiň berýän maglumatyna görä, bu 2020-nji ýylyň aprelinden bäri bir günüň içindäki iň uly nyrh ýokarlanmasy boldy. «RBK» neşiriniň bellemegine görä, nebit 119 dollar nyrhyndan soňky gezek 2022-nji ýylyň 17-nji iýunynda satylypdy.
Muňa garamazdan, nebitiň has-da ýokary baha ýeten wagtlary bar. 2022-nji ýylyň martynda onuň bir bareli 139 dollardan satylýardy, taryhda iň ýokary görkeziji bolsa 2008-nji ýylda hasaba alnyp, ol 147 dollardan hem aşypdy.
Dünýä bazarynda nebitiň nyrhynyň ýokarlanmagy eýýäm birnäçe gün bäri yzygiderli dowam edýär, bu ýagdaý Ýakyn Gündogardaky geosyýasy dartgynlylyk bilen baglanyşdyrylýar. «Bloomberg» bilen söhbetdeş bolan seljerijileriň çaklamasyna görä, çig malyň bahasy mundan beýläk hem gymmatlamagyny dowam etdirer.
