Braziliýaly alymlar antioksidantlara baý bolan täze bir önümi — şokoladly baly döretdiler. Bu täsin iýmitiň esasy düzümi şokolad önümçiliginiň galyndysy bolan kakao gabyklaryndan emele gelýär.
Science Daily žurnalynda çap edilen barlaga görä, alymlar Braziliýanyň ýerli iňňesiz arylarynyň balyny tebigy erediji hökmünde ulanyp, kakao gabyklaryndan teobromin, kofein we fenol birleşmeleri ýaly biologik işjeň maddalary bölüp almagy başardylar. Bu maddalar organizmde antioksidant we sowuklama garşy täsiri bilen tanalýar, şeýle hem ýürek-damar ulgamynyň işini gowlamaga kömek edýär. Peýdaly maddalary bölüp almak üçin ultrases ekstraksiýasy usuly ulanyldy. Bu usulda balyň we kakao gabyklarynyň içine ýörite zond ýerleşdirilip, ses tolkunlary arkaly emele getirilen mikrogabarçyklar ösümlik materialyny böleklere bölýär we peýdaly birleşmeleriň bala geçmegini üpjün edýär.
Hiç hili himiki erediji talap etmeýändigi üçin ekologiýa taýdan arassa hasaplanýan bu önümi diňe iýmit hökmünde däl, eýsem kosmetika maksatly hem ulanyp bolýar.
Goýy şokolady ýatladýan balyň tagamy düzümindäki kakao mukdaryna görä üýtgäp bilýär. Alymlar häzirki wagtda ultrasesiň balyň mikropatogenlerine täsirini hem öwrenýärler. Bu tehnologiýa mikroorganizmleri ýok edip, balyň saklanyş möhletini uzaltmaga kömek edip biler.
