Halkara zenanlar gününiň bellenilýän säherinde Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine geldi. Gahryman Arkadagymyz Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ştab-kwartirasynda zenanlaryň baýramy mynasybetli gutlag sözi bilen çykyş etdi. Bu barada TDH agentligi habar berdi.
Milli Lider, ilki bilen, Gurbanguly Berdimuhamedow adyndaky Çagalar sagaldyş-dikeldiş merkezinde saglyklaryny dikeldýän gyzjagazlary we Merkeziň lukman gelin-gyzlaryny Halkara zenanlar güni bilen gutlady. Bu ýerde saglygyny dikeldýän çagalar özleriniň joşgunly çykyşlary bilen Milli Lidere minnetdarlyk bildirdi.
Gahryman Arkadagymyz ýurduň ähli gelin-gyzlaryny gutlap eden çykyşynda ýurtda belent ruhly, çeper elli zenanlaryň sarpasynyň belent tutulýandygy we olaryň zähmetine uly hormat goýulýandygy belläp, türkmen zenanlarynyň maşgala ojagynyň eýesi, wepaly ýanýoldaş we mähriban uýa hökmünde jemgyýetdäki ornunyň aýratyndygyny nygtady.
«Ynsana ýaşaýşy peşgeş beren ene hemişe-de tagzym edilmeli mukaddeslikdir. Ol Watan, ýurt, toprak bilen deň derejede goýulýandyr. «Ene toprak» diýlen düşünje hem ýöne ýerden dörän däldir. Şahyryň sözleri bilen aýtsak, biz enäni dünýäniň görki we durky hasaplaýarys. Eneleri begendirmek, razy etmek iň uly bagtdyr. Eneleriň ak patasy, alkyşy ýollaryňy açýan gudrat hasap edilýär» diýip, ol gutlag sözünde belläp geçdi.
Ýurtda köp çagaly eneleriň yzygiderli goldanylýandygy, olara "Ene mähri" diýen hormatly adyň dakylyp, ýokary amatlyklary bolan täze öýleriň açarlarynyň gowşurylýandygy, şeýle-de zenanlara pul sowgatlarynyň gowşurylýandygy aýratyn bellenildi.
Gurbanguly Berdimuhamedow adyndaky Çagalar sagaldyş-dikeldiş merkeziniň baş direktory M.Öküzowa Milli Lidere Halkara zenanlar güni mynasybetli gutlag sözleri üçin ähli gelin-gyzlaryň adyndan hoşallyk bildirdi.
Gurbanguly Berdimuhamedow lukmanlara we merkeziň ähli işgärlerine mundan beýläk-de üstünlik arzuw edip, bu ýerden ugrady.
Dabaranyň çäklerinde Türkmenistanyň Prezidenti Serdar Berdimuhamedowyň adyndan zenanlara we gyzjagazlara pul sowgatlary, şeýle hem Gahryman Arkadagymyzyň adyndan baýramçylyk sowgatlary gowşuryldy.
