2026-njy ýylyň 1-6-njy marty aralygynda «Arkadag» futbol klubunyň janköýerler toparynyň agzalary Türkiýäniň iň belent nokady bolan Agry dagyna çykdy.
Türkmenistanyň ilçihanasynyň goldawy bilen guralan bu çäre ýurduň Garaşsyzlygynyň 35 ýyllygyna hem-de 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» şygar bilen yglan edilmegine bagyşlandy diýip, «Altyn asyr» neşiri habar berdi.
Talyplardan we sport söýüjilerden ybarat bolan ekspedisiýa tejribeli alpinist Agajan Öwlýagulyýew ýolbaşçylyk etdi. Gatnaşyjylar 5137 metr belentlikde Türkmenistanyň Döwlet baýdagyny, şeýle hem «Arkadag» FK-nyň we 2026-njy ýylyň nyşanlaryny açdy.
Bu çäre sport diplomatiýasyny ösdürmäge we milli agzybirligi berkitmäge gönükdirilendir.
Türkmen sportuna bolan halkara gyzyklanmany artdyrmagyň çäklerinde Ankara we Antalýa şäherlerinde «Arkadag» FK-nyň janköýerler klublary döredildi. Türkmen ýaşlarynyň bu başlangyjy Türkmenistan bilen Türkiýäniň arasyndaky jemgyýetçilik-medeni gatnaşyklary işjeňleşdirmäge hem-de milli sportuň daşary ýurtdaky abraýynyň barha artýandygyny görkezmäge hyzmat edýär.
