Iňlis alymlarynyň täze barlagy adamlaryň doýagarna nahar iýenlerinden soň hem näme üçindir ýene ýeňil-ýelpaý iýmitlerden ýüz öwrüp bilmeýändikleriniň sebäbini düşündirýär. Gündogar Angliýa we Plimut uniwersitetleriniň hünärmenleri öz geçiren barlaglarynda adam bedeni fiziki taýdan doýan hem bolsa, beýniniň iýmitleriň suratyndan we ysyndan täsirlenmegi dowam edýändigini ýüze çykardylar.
Barlagyň esasy awtory doktor Tomas Sambrukyň aýtmagyna görä, semremek meselesi adamyň diňe bir şahsy tertip-düzgüni bilen bagly däl. Ol muny: «Semizlik dünýä derejesinde saglygy goraýyşyň düýpli meselesine öwrüldi. Emma onuň artmagyny erk ýa erksizlik bilen baglamak nädogrydyr. Bu — biziň iýmitden doly gurşawymyzyň we işdä açyjy çagyryşlara bolan täsirlenmämiziň bedeniň tebigy işdäni duýup bilijiligini basyp ýatyrýandygynyň alamatydyr» diýmek bilen, has düýpli düşündirýär.
Synaga 76 adam gatnaşdy. Olar sylag hökmünde süýjülikler we ýeňil tagamlar berilýän oýun oýnadylar. Oýnuň dowamynda olaryň beýni işjeňligi elektroensefalografiýa (EEG) enjamynyň kömegi arkaly yzarlanyldy. Barlagyň netijesinde nahardan soň ýene bir zatlar iýmek isleginiň peselendigi, ýöne beýniniň «sylag almak» bilen baglanyşykly böleginiň iýmitiň suratyna öňküsi ýaly işjeň täsirlenýändigi anyklandy.
«Biz beýniniň, adamyň nähili doklugyna garamazdan, iýmitiň özüne çekijiligini peseltmekden ýüz öwürýändigini bildik. Bu bolsa aşa köp iýmäge eltýän gönümel ýoldur» diýip, doktor Sambruk nygtaýar.
Barlagyň netijeleri Appetite žurnalynda çap edildi.
