Türkmenistanda saýlawçylar bilen dalaşgärleriň duşuşyklaryna badalga berildi

2026-njy ýylyň 29-njy martynda geçiriljek Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň saýlawlaryna taýýarlyk işleri işjeň dowam edýär. Häzirki wagtda ýurduň ähli künjeklerinde dalaşgärleriň we olaryň ynanylan wekilleriniň saýlawçylar bilen duşuşyklary geçirilýär.
Bu jemgyýetçilik-syýasy çäre Türkmenistanyň saýlaw kanunçylygyna we halkara hukugyň kadalaryna laýyklykda, açyklyk hem-de bäsdeşlik esasynda guralýar. Duşuşyklaryň dowamynda saýlawçylar dalaşgärleriň terjimehallary, hünär we guramaçylyk ukyplary, öňde goýan maksatnamalarynyň esasy ugurlary bilen ýakyndan tanyşýar. Dalaşgärler öz maksatnamalarynda Watanyň gülläp ösmegine, halkyň ýaşaýyş-durmuş derejesini has-da ýokarlandyrmaga gönükdirilen anyk wezipeleri beýan edýär.
Ähli dalaşgärler üçin deň şertler döredilip, olar saýlawçylaryň sowallaryna jogap berýär we milli özgertmeler maksatnamalaryny durmuşa geçirmekde öz bilim-tejribelerini gaýgyrmajakdyklaryna ynandyrýar. Saýlaw möwsümi baradaky maglumatlar köpçülikleýin habar beriş serişdelerinde we Türkmenistanda Saýlawlary we sala salşyklary geçirmek boýunça merkezi toparyň ýörite saýtynda yzygiderli beýan edilýär. Bu saýlawlar ýurtda demokratik ýörelgeleri has-da berkitmegiň we halk häkimiýetliligini dabaralandyrmagyň ýolunda möhüm ädim bolar.