3-nji martda Türkmenistanyň Rumyniýadaky ilçisi A. Annaýew Buharestiň Agronomik ylymlar we weterinar medisinasy uniwersitetiniň wise-rektory Teodor Ioan Treske bilen duşuşdy. Bu barada Türkmenistanyň DIM-iniň metbugat gullugy habar berdi.
Söhbetdeşligiň dowamynda Türkmenistan bilen Rumyniýanyň arasynda bilim we ylym ulgamlaryndaky hyzmatdaşlygyň dostlukly hem-de netijeli häsiýeti bellenildi. Taraplar S.A.Nyýazow adyndaky Türkmen oba hojalyk uniwersiteti bilen Buharestiň ýokary okuw mekdebiniň arasynda hereket edýän hyzmatdaşlyk ylalaşygynyň çäklerinde eýýäm ýola goýlan gatnaşyklaryň ähmiýetini nygtady.
Duşuşyga gatnaşyjylar iş ýüzündäki hyzmatdaşlygy giňeltmegiň meseleleri boýunça pikir alyşdy. Hususan-da, bilelikdäki akademiki we hünärmenler çärelerini geçirmek barada gürrüň edildi.
Şeýle hem Türkmenistanda 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilendigi bellenildi. Şunuň bilen baglylykda, S.A.Nyýazow adyndaky Türkmen oba hojalyk uniwersitetiniň gatnaşmagynda mowzuklaýyn çäreleri guramagyň mümkinçilikleri maslahatlaşyldy.
Duşuşygyň jemleri boýunça taraplar özara bähbitli hyzmatdaşlygy ösdürmäge we netijeli gatnaşyklary dowam etdirmäge taýýardyklaryny bildirdi.
Türkmenistanyň ilçisi Rumyniýanyň agrar ýokary okuw mekdebi bilen hyzmatdaşlygy maslahatlaşdy
- şu gün 14:26
- 341
