Ýaponiýanyň Kidzuki şäherinde 3D-çap tehnologiýasyny ulanmak arkaly gurlan iki gatly O House ýaşaýyş jaýynyň gurluşygy tamamlandy. Bu taslama COBOD senagat printeriniň kömegi bilen Onocom we Kizuki kompaniýalary tarapyndan durmuşa geçirildi. Bu Ýaponiýada ulanmaga resmi rugsat berlen şeýle görnüşli ilkinji iki gatly desgadyr.
Jaýyň meýdany 50 inedördül metre deňdir. Onuň binýady 0,5 metr çuňlukda ýerleşip, binanyň ýer üstündäki beýikligi bolsa 7 metre ýetýär. Binýatda sütünler bilen berkidilen demir-beton garnuw gurluşyň esasyny emele getirýär. Jaýyň sement garyndysyndan çap edilen diwarlary, poly we potology hem şol garnuwyň içinde ýerleşdirilipdir. Binanyň käbir bölekleri gurluşyk meýdançasynyň daşynda taýýarlanylyp, printer jemi dört adam tarapyndan dolandyrylypdyr.
Jaýyň binagärligi tebigy gowaklara çalym edýär. Binanyň diwarlary egreldilen arka görnüşde bolup, onda dikligine goýlan adaty dörtbürç penjireler ýokdur. Tebigy ýagtylyk jaýyň depesindäki aýna gapaklar arkaly üpjün edilýär. Ýokarky gatda aşhana, naharhana we myhman otagy, aşaky gatda bolsa aýry hajathana-hammam ulgamy bolan ýatylýan otag ýerleşýär.
Jaýyň gurluşygy dünýäde iň berk talaplaryň biri hasaplanýan Ýaponiýanyň seýsmiki durnuklylyk kadalaryna doly laýyk gelýär. COBOD-yň baş direktory Henrik Lund-Nilseniň bellemegine görä, bu taslamanyň tamamlanmagy 3D-çap tehnologiýasynyň ýer titreme ähtimallygy ýokary bolan sebitlerde hem ulanylyp bilinjekdigini subut edýär.
Häzirki wagtda bu desga diňe görkezme maksady bilen ulanylýar. Geljekde şeýle binalaryň gurluşygyny ýola goýmagy, şeýle-de bu tehnologiýany goranmak ulgamynda we tebigy harasatlardan soňra dikeldiş işlerinde ulanmagy meýilleşdirýärler.
