ABŞ-da atlaryň arasynda uzak ýaş rekordy resmi taýdan hasaba alyndy. Wirjiniýa ştatynda ýaşaýan Fensi lakamly baýtal dünýäde häzirki wagtda ýaşaýan atlaryň iň garrysy hökmünde ykrar edildi — 1-nji aprelde ol 38 ýaşaýar.
Fensiniň ýaşy resminama arkaly hem tassyklanyldy we Ginnesiň rekordlar kitabyna girizildi. Atlaryň ortaça 25-30 ýaşaýandygyny göz öňünde tutsaň, bu san hakykatdan hem haýran galdyrýar.
Fensi 1988-nji ýylda doguldy. Onuň ömri eýesi Peýj Sigmon Blumeriň durmuşy bilen berk baglanyşyklydyr. Olaryň tanyşlygy eýesi bary-ýogy sekiz ýaşly gyzjagazka, atyň özi bolsa on iki ýaşyndaka başlandy. Şondan bäri olar aýrylyşmadylar diýen ýaly. Ençeme ýylyň dowamynda Fensi dürli keseller, ýaş aýratynlyklary, görşüň kem-kem peselmegi ýaly kynçylyklary başdan geçirýär. Ýöne baýtalyň eýesiniň aýtmagyna görä, rekordçynyň kesir, özbaşdak hem çakgan häsiýetleri hergiz üýtgemändir.
Häzirki wagtda Fensi ýeke däl. Rouz lakamly eşek onuň ýörite kömekçisi we ýoldaşdyr. Rouz garran hem tas batyl haldaky Fensiniň ýanyndan bir ädim hem aýrylman, oňa ýoluny saýgarmaga kömek edýär.
Haýwanlar wagtlarynyň köp bölegini bilelikde geçirýärler. Bu ysnyşykly dostluk Fensiniň gündelik durmuşynyň aýrylmaz bölegine öwrülip gitdi.
