Halkara zenanlar güni mynasybetli Aşgabat we Arkadag şäherlerinde, şeýle hem welaýatlarda baýramçylyk dabaralary geçiriler. Olaryň çäginde sekiz we şondan köp çagany dünýä inderen hem-de terbiýeläp ýetişdiren enelere Türkmenistanyň “Ene mähri” diýen hormatly adynyň nyşanlary we döwrebap ýaşaýyş jaýlarynyň açarlary dabaraly ýagdaýda gowşurylar.
Bu barada Türkmenistanyň Mejlisiniň Başlygy Dünýägözel Gulmanowa sanly ulgam arkaly geçirilen Ministrler Kabinetiniň nobatdaky mejlisinde habar berdi diýip, TDH ýazýar.
Hormatly Prezidentimiz Serdar Berdimuhamedow köp çagaly enelere bu hormatly ady dakmak hakynda Permana gol çekip, ýurdumyzda 8-nji martda Halkara zenanlar gününiň giňden bellenilip geçiljekdigini aýtdy. Döwlet Baştutanymyz mukaddes maşgala ojagyny gorap saklamakda we ösüp gelýän ýaş nesle mynasyp edep-terbiýe bermekde enelerimiziň ornunyň örän uludygyny aýratyn belledi.
