Tesla kompaniýasy "Full Self Driving" (FSD) ulgamynyň täze nusgasynyň synaglaryndan wideogörünişleri paýlaşdy. Täzelenen ulgam v14.2.1 belgisi bilen belgilendi. "ITHome" portalynyň habar bermegine görä, ulgam indi awtomobiliň daşyndaky adamlaryň berýän el yşaratlaryny tanamagy öwrendi.
Wideoda birnäçe ýol ýagdaýlary görkezilýär. Elektromobil ýoly kadalaşdyryjy polisiýa işgäriniň signallaryna we başga bir sürüjiniň el yşaratlaryna dogry reaksiýa berýär. Şeýle hem, ulagyň dar ýoldan geçmäge kömek edýän adamyň görkezmelerine eýerýändigi görkezilýär. Epizodlaryň birinde awtomobil elinde kiçijik "STOP" belgisi bolan adamyň öňünde saklanýar. ABŞ-da şeýle belgiler köplenç çagalaryň ýoldan geçýän ýerlerinde ulanylýar.
Ilon Mask "X" durmuş ulgamynda ýarym awtonom dolandyryş ulgamynyň indi yşaratlara düşünmäge ukyplydygyny tassyklady. Emma bu täzelenmäniň ulanyjylar üçin haçan elýeterli boljakdygy barada anyk möhlet aýdylmady.
Kompaniýa "Full Self Driving" ulgamynyň heniz hem doly derejeli awtopilot däldigini nygtaýar. Ulgam sürüjiniň kämilleşdirilen kömekçisi hökmünde işleýär we ruldaky adamy ulagy dolandyrmak jogapkärçiliginden boşatmaýar.
