YHG ýurtlary Türkmenistanyň bilelikdäki söwda zolaklaryny döretmek baradaky başlangyjyny goldady

25-nji fewralda Tähranda Ykdysady Hyzmatdaşlyk Guramasynyň (YHG) Hemişelik wekilleriniň Geňeşiniň mejlisi geçirildi. Duşuşykda serhetýaka we sebit söwdasyny işjeň ulanmak arkaly agza ýurtlaryň arasyndaky söwda dolanyşygyny artdyrmagyň mümkinçilikleri maslahatlaşyldy.
Söwda üçin amatly gurşawy döretmäge we ylalaşylan artykmaçlyklar hem-de ileri tutulýan ugurlar ulgamy arkaly sebit hyzmatdaşlygyny ösdürmäge aýratyn üns berildi. Mejlisiň dowamynda Türkmenistanyň Prezidentiniň başlangyjy bilen bilelikdäki söwda zolaklaryny döretmegiň tehniki-ykdysady esaslandyrma barlagyny geçirmek meselesine hem seredildi.
Mejlisiň barşynda Türkmenistanyň bu ugurdaky tejribesi, hususan-da, Türkmenistan bilen Özbegistanyň arasynda işe girizilen bilelikdäki söwda zolagynyň ähmiýeti barada maglumat berildi. Netijede, Sekretariat tarapyndan degişli taslamanyň taýýarlanmagynyň esasynda tehniki-ykdysady esaslandyrma barlagyny geçirmek teklip edildi.
YHG-yň Hemişelik wekilleriniň geňeşi bu teklibi goldady.
Ýakyn wagtda Guramanyň Sekretariaty türkmen tarapynyň başlangyjyny durmuşa geçirmek boýunça taslamany taýýarlamaga girişer.