Türkmenistanyň Bilim ministrliginde Gyrgyzystanyň Ilçisi bilen duşuşyk geçirildi

2026-njy ýylyň 24-nji fewralynda Türkmenistanyň bilim ministri J. Gurbangeldiýew bilen Gyrgyz Respublikasynyň Türkmenistandaky Adatdan daşary we Doly ygtyýarly Ilçisi Azizbek Madmarowyň arasynda duşuşyk geçirildi. Duşuşykda bilim we ylym ulgamlarynda ikitaraplaýyn hyzmatdaşlygy täze derejä çykarmagyň ileri tutulýan ugurlary ara alnyp maslahatlaşyldy. Bu barada Bilim ministrliginiň metbugat gullugy habar berýär.
Gepleşikleriň dowamynda taraplar tejribe paýlaşmagyň we bilelikdäki ylmy taslamalary durmuşa geçirmegiň ähmiýetini nygtady. Türkmen tarapy gyrgyzystanly okuwçylary şu ýylyň 8-13-nji apreli aralygynda Aşgabatda geçiriljek III Halkara matematika olimpiadasyna gatnaşmaga çagyrdy. Şeýle hem, bu halkara bäsleşiginiň çäklerinde Gyrgyz Respublikasynyň bilim we ylym ministriniň Türkmenistana iş saparyny guramak meselesi maslahatlaşyldy.
Öz gezeginde, Gyrgyzystanyň Ilçisi türkmen wekiliýetini Çarwadarlaryň 6-njy Bütindünýä oýunlarynyň çäklerinde guraljak Halkara ylmy-amaly maslahata gatnaşmaga çagyrdy.
Duşuşygyň gün tertibinde bilim resminamalarynyň we diplomlaryň özara ykrar edilmegi, şeýle hem orta hünär bilimi ulgamynda gatnaşyklary ýola goýmak meselelerine aýratyn üns berildi. Gepleşikleriň ahyrynda taraplar dostlukly we hyzmatdaşlyk gatnaşyklaryny has-da berkitmäge ygrarlydyklaryny tassyklady.