Arkadag şäherinde başlanyp, Balkan we Daşoguz welaýatlarynda dowam eden dabaraly ýörişlerden soň, «Galkynyş» milli at üstündäki oýunlar toparynyň sapary ýurduň Lebap welaýatyna gönükdi. Bu çäreler 2026-njy ýylyň «Garaşsyz, baky Bitarap Türkmenistan – bedew batly at myradyň mekany» diýlip yglan edilmegi mynasybetli ýurt boýunça ýaýbaňlandyrylan baýramçylyk dabaralarynyň dowamy boldy.
Welaýatyň Taryhy we ülkäni öwreniş muzeýiniň öňünde ýaşulular, medeniýet işgärleri we şäher ýaşaýjylary topary duz-çörek bilen garşy aldy. Seýitnazar Seýdi adyndaky döwlet sazly drama teatrynyň we bagşylaryň şowhunly çykyşlary dabaranyň ruhuny belende göterdi. Toparyň agzalary muzeýde guralan sergi bilen tanşyp, türkmen atşynaslyk sungatynyň gadymy taryhy hem-de milli mirasymyzyň gymmatlyklary bilen gyzyklandy.
Dabaraly ýöriş Türkmenabat şäheriniň «Bitarap Türkmenistan» şaýolunyň ugry bilen dowam etdi. Topar «Türkmeniň ak öýi» binasyna tarap ýolda Seýitnazar Seýdi adyndaky teatr we welaýat kitaphanasynyň öňündäki meýdançalarda behişdi bedewleri wasp edýän edebi-sazly kompozisiýalary synlady. Şäheriň ýaşaýjylary «Galkynyş» toparynyň agzalaryny uly ruhubelentlik we elçarpyşmalar bilen garşy aldy.
Baýramçylyk dabaralarynyň esasy bölegi «Türkmeniň ak öýi» binasynda dowam etdi. Bu ýerde atşynaslyk ýörelgelerini şöhlelendirýän sergi görkezildi hem-de ahalteke bedewlerine goýulýan belent sarpa we toparyň halkara derejesinde gazanan üstünlikleri dogrusynda çykyşlar edildi. Şeýle hem, Prezident Serdar Berdimuhamedowyň adyna Ýüzlenme kabul edildi.
Tomaşalar zalynda «Galkynyş» toparynyň ezber ýigitleriniň we gyzlarynyň at üstündäki hereketleri tomaşaçylarda uly täsir galdyrdy.
Dabaralaryň ahyrynda «Türkmeniň ak öýi» toplumynda Oraza aýynyň dowam edýän günlerinde agzaçar sadakasy berildi.
