ChatGPT web goşundysynyň kodunda aýda 100 dollar bahasy bolan täze Pro Lite tarif nyrhnamasy baradaky maglumatlar tapyldy. Bu barada OpenAI-niň täzeliklerinden takyk maglumatlary paýlaşmakda tanalýan barlagçy Tibor Blaho habar berdi.
Häzirki wagtda OpenAI-yň mugt, 8 dollarlyk Go, 20 dollarlyk Plus, 200 dollarlyk Pro, şeýle-de toparlaýyn Business we Enterprise meýilnamalaryndan ybarat bäş sany tarifi bar. Plus we Pro nyrhanamalarynyň arasyndaky bahada 10 esse aratapawut köplenç ulanyjylaryň arasynda närazylyk döremegine getirýär. Sebäp Plus tarifiiniň limitleri ýetmeýän ulanyjylar birden on esse köp pul tölemäge mejbur bolýarlar. Pro Lite edil şu aralykdaky boşlugy doldurmaga niýetlenendir.
Backend-API jogabynda onuň nyrhy (salgyt bilen bilelikde) aýyna 100 dollar diýlip takyk görkezilipdir. Häzirlikçe onuň funksiýalaryň dizaýny Pro tarifiniňkä meňzeş: iň oňat modelleriň çäksiz ulanyşy, kämilleşdirilen sesli režim (Advanced Voice Mode), birinji derejeli Codex agenti we surat/wideo döretmek üçin maksimal limitler.
Munuň häzirlikçe diňe taslama görnüşinde bolmagy-da mümkin. Ahyrynda hödürlenjek mümkinçilikler Pro tarifindäkiden biraz üýtgeşikräk-de bolup biler.
OpenAI häzirlikçe täze nyrhnamanyň girizilýänini resmi taýdan yglan etmedi. Ýöne töleg sahypasynyň koduň içinde eýýäm taýýar durmagy bu nyrh meýilnamasynyň ýakyn wagtda işe girizilip bilinjekdigini görkezýär.
