Hytaýly alymlar diňe bir howpsuz bolman, eýsem ekologiýa taýdan arassa bolan täze akkumulýator işläp düzdüler. Taslamanyň esasy artykmaçlygy — batareýanyň göwrümini ýitirmezden 120 müňden gowrak zarýad alyş-beriş sikline çydamagyndadyr. Bu bolsa oňa her gün zarýad berlen ýagdaýynda-da 100 ýyl töweregi hyzmat edip biljekdigini aňladýar.
Adatça batareýalaryň içinde dökülse eliňi ýakýan kislota ýa-da aşgarly erginler ulanylýan bolsa, bu batareýada magniý duzlaryna (MgCl₂) ýa-da kalsiý duzlaryna (CaCl₂) esaslanýan, pH derejesi 7,0-a deň bolan neýtral suwuk elektrolit peýdalanylypdyr. Akkumulýatoryň içindäki suwuklygyň düzümi edil Aziýa ýurtlarynda gowy görlüp iýilýän tofu (soýa doragy) tagamy taýýarlanylanda ulanylýan duzly suwa çalymdaş. Ýagny, ol şeýle bir arassa we howpsuz welin, hatda tebigata-da, adama-da hiç hili zeper ýetirenok.
Zäherli we ýeňil alawlaýan litiý-ion akkumulýatorlarynyň elektrolitlerinden tapawutlylykda, suwly ulgam şeýle töwekgelçilikleri aradan aýyrýar.
Alymlar bitarap gurşawda magniý we kalsiý ionlaryny durnukly saklamak üçin ýörite kowalent organiki polimerlerden ybarat anody döretdiler.
Akkumulýator öýjüginiň işçi kuwwaty takmynan 2,2 W, udel energiýasy bolsa 48,3 Wt·sag/kg çenli ýetýär.
Halkara ylmy toparyň gazanan bu üstünligi hakynda meşhur Nature Communications žurnalynda gürrüň berilýär.
