Türkmenistan bilen Gruziýa parlamentara hyzmatdaşlyk barada Ylalaşyga gol çekdi

2026-njy ýylyň 23-nji fewralynda Türkmenistanyň Mejlisiniň Başlygy D.Gulmanowanyň Gruziýa resmi sapary başlandy. Saparyň çäklerinde Gruziýanyň Parlamentiniň Başlygy Ş.Papuaşwiliniň ýolbaşçylygynda Parlamentiň binasynda iki ýurduň kanun çykaryjy edaralarynyň wekilleriniň arasynda duşuşyk geçirildi. Bu barada Türkmenistanyň Mejlisiniň metbugat gullugy habar berýär.
Gepleşikleriň dowamynda taraplar türkmen-gruzin gatnaşyklarynyň yzygiderli ösýändigini we özara bähbitli hyzmatdaşlygyň barha giňeýändigini kanagatlanma bilen belledi. Parlament diplomatiýasynyň döwletara gatnaşyklary berkitmekdäki orny aýratyn nygtalyp, dostluk toparlarynyň her ýylky duşuşyklarynyň we tejribe alyşmalaryň ähmiýeti bellenildi.
Taraplar hyzmatdaşlygyň täze ugurlaryny, hususan-da, iki ýurduň ýaş we zenan parlamentarileriniň arasynda gatnaşyklary ýola goýmak meselelerini ara alyp maslahatlaşdy. Şeýle hem halkara guramalaryň çäklerinde birek-biregiň başlangyçlaryny özara goldamak tejribesiniň dowam etdirilmegine taýýarlyk tassyklanyldy.
Türkmenistanyň Mejlisiniň Başlygy Gruziýanyň Parlamentinde Hormatly myhmanlaryň kitabyna ýazgy galdyrdy.
Duşuşygyň ahyrynda Türkmenistanyň Mejlisi bilen Gruziýanyň Parlamentiniň arasynda Hyzmatdaşlyk etmek hakynda Ylalaşyga gol çekildi. Bu resminama iki ýurduň kanun çykaryjy edaralarynyň arasyndaky hyzmatdaşlygy täze derejä çykarmak üçin esas bolar. Taraplar gol çekilen ylalaşygyň ikitaraplaýyn gatnaşyklary ösdürmäge itergi berjekdigine ynam bildirdi.