Häzirki wagtda Günüň Ýere öwrülen tarapynda hiç hili tegmil görünmeýär diýip, Russiýanyň Ylymlar akademiýasynyň Kosmos barlaglary institutynyň Gün astronomiýasy laboratoriýasy habar berdi.
«Häzirki pursatda Günüň ýüzünde hatda iň kiçijik tegmil hem görünmeýär. Ýyldyz hiç hili aýratynlygy bolmadyk arassa disk görnüşinde dur» diýlip, laboratoriýanyň resmi maglumatynda aýdylýar.
Alymlaryň düşündirişine görä, Gün tegmilleri magnit meýdanlarynyň toplanmagy netijesinde ýüze çykýar we olar, adatça, ýyldyzyň ýüzünde hemişe bolýar. Tegmilleriň sany we ölçegi Günüň işjeňlik derejesini göni kesgitleýär, sebäbi hut magnit meýdanlary Gündäki durnuksyz partlamalary "iýmitlendirýär". Tegmilleriň ýoklugy Günüň işjeňliginiň iň pes derejesindäki döwürlere mahsusdyr.
Mundan öň şeýle ýagdaý iň soňky gezek 2021-nji ýylyň 11-nji dekabrynda hasaba alnypdy. Şunlukda, Gün dört ýyldan gowrak wagtdan bäri ilkinji gezek dolulygyna "boş" disk görnüşine giripdir.
Hünärmenler taryhda işjeňligiň uzak wagtlap peselen pursatlarynyň bolandygyny, mysal üçin, Kiçi Buzluk döwrüniň iň gyzgalaňly wagtyna gabat gelen Maunder minimumyny (1645–1715-nji ýyllar) ýatlatdylar.
Şol bir wagtyň özünde, barlagçylar häzirki peselişi wagtlaýyn hasaplaýarlar, sebäbi häzirki döwrüň (sikliň) iň ýokary derejesinden bary-ýogy bir ýarym ýyl wagt geçdi.
