«Titanik» we «Awatar» filmleriniň režissýory Jeýms Kemeron Netflix platformasynyň Warner Bros. studiýasyny satyn almak ähtimallygyndan ynjalyksyzlanýandygyny aýtdy. Onuň pikiriçe, bu şertnama iş ýerleriniň azalmagyna we kinoteatrlaryň uly zyýan çekmegine sebäp bolup biler.
Režissýor bu barada duýduryş hatyny ýazyp, ony antimonopoliýa syýasaty we sarp edijileriň hukuklary boýunça senat kömekçi komitetiniň başlygyna ugratdy.
«Men Warner Brothers Discovery-niň Netflix-e satylmagynyň bütin ömrümi bagyşlan kino biznesim üçin betbagtçylykly netijelere getirjekdigine şübhelenmeýärin. Elbetde, meniň ähli filmlerim beýleki wideo platformalarda hem satylýar, ýöne meniň ilkinji söýgim — kinoteatrlar» diýip, Kemeron hatynda ýazýar.
Ol, eger-de bu söwda amala aşaýsa, kinoteatrlaryň «batyp barýan gämä» meňzejekdigini we munuň köpçülikleýin işsizlik bilen birlikde, amerikan kino pudagynyň düzüminiň üýtgemegine getirjekdigini-de duýdurýar.
2025-nji ýylyň dekabrynda Netflix Warner Bros. studiýasyny, şol sanda HBO Max we HBO kanalyny 82,7 mlrd dollara satyn aljakdygyny yglan etdi. Bu şertnama amala aşan ýagdaýynda Netflix «Garri Potter», «DC Comics» we «Tagtlar oýny» ýaly ägirt uly franşizalara eýe çykar. Ýöne bu söwdada Paramount Skydance kompaniýasy hem bäsleşýär we olar munuň üçin has ýokary mukdary — 108,4 mlrd dollary hödürlediler.
ABŞ-nyň barlag edaralary islendik birleşmäni-de berk gözden geçirerler. Sebäbi bazardaky paýy 30%-den ýokary bolan kompaniýalaryň birleşmegi bikanun hasaplanýar. Netflix bolsa striming bazaryna YouTube ýaly mugt hyzmatlaryň hem girýändigini aýdyp, bu babatda öz paýynyň çäkden aşmaýandygyny delillendirýär.
